لئش بیر یانا باش بیر یانا – عرفان گوردال

باغلاما دیدنی از باغلاما عرفان گوردال

لئش بیر یانا باش بیر یانا باغلاما baglama در فیلم عرفان گوردال

لئش بیر یانا باش بیر یانا baglama قوپوز ویدیو در فیلم عرفان گوردال – لئش بیر یانا باش بیر یانا قوپوز ویدیو کلیپ در فیلم عرفان گوردال – لئش بیر یانا باش بیر یانا کلیپ

 

آنا آنلاتیم

دورنا تئلی – کؤراوغلو داستانی

ائیواز چنلیبئله گلندن بری تئللی نیگارین اۆرگی یئرینه گلمیشدی. تای اۆرگینده هئچ بیر دردی یوخ ایدی. قوچ کور‌اوغلو کیمی ار بیر یانیندا، ائیواز کیمی اوغول بیر یانیندا، بَیلره، پاشالارا قان اۇددوران دلیلر ده کی، گؤزونون قاباغیندا. کئف، لذت، داماق بیریدی کی، او دا نیگاردایدی. هردن چنلیبئلین لاله‌لی، نرگیزلی اتکلرینه باخیب اؤز-اؤزونه دئییردی: “گؤره‌سن بۆتون آروادلارین آراسیندا هئچ منیم کیمی خوشباختی وارمی؟”. کور‌اوغلونون داماغی اوندان دا چاغ ایدی. او، هم اؤزونه اوغول گتیرمیشدی، هم ده آرخا، کؤمک گتیرمیشدی. ائیواز چوخ چکمه‌دی کی، جانلارا دیَن ایگید بیر اوغلان اولدو. دلیلرین هامیسی بۇ ایگیدلییه گؤره اونا حؤرمت ائله‌ییردیلر. هامی‌نین گؤزونده اول کور‌اوغلو ایدی، سونرا نیگار، سونرا دا ائیواز. دئییرلر کی، کور‌اوغلو بوش واختلاری همیشه دلیلرله مشق ائله‌ییب تعلیم کئچردی. آت مینمک، نیزه آتماق، قێلینج وۇرماق، قالخان تۇتماق، اوخ آتماق اونلارین پئشه‌سی ایدی. هئچ ائله گۆن اولمازدی کی، دلیلر ایچینده تزتزه آداملار اونلارا قوشولماسین. اونلار دا بۇ تعلیمدن اؤیره‌نیردیلر. اۇستاد بئله دئییر کی، یئنه بیر گۆن دلیلر چنلیبئلده بؤلوک-بؤلوک اولوب مشق ائله‌ییردیلر. ائیواز دا یاراقلی-یاساقلی بیر دسته ایله آتلانیب داوا مشقینه چێخمیشدی. دلیلر مشق ائله‌یه-ائله‌یه کور‌اوغلویا ساری آت چاپیردیلار. ائیواز عرباتین اۆستونده دلیلرین قاباغینجا گلیردی. کور‌اوغلونون اونون باشینا تاخدیغی دۇرنا تئلی ده پاپاغیندا ایدی. کور‌اوغلو ائیوازی بئله گؤرنده اۆرگی تئللندی، قوللاری آچیلدی، اۆزونو نیگار خانیما تۇتوب، آلدی گؤرک نه دئدی:

  • نیگار خانیم، سنه دئییم،
  • بۇ گلن ائیواز، بۇ گلن.
  • دیلی دوداغییی یئییم،
  • بۇ گلن ائیواز، بۇ گلن.
  • ائیوازیم اون بئش یاشیندا،
  • قۆدرت قلمی قاشیندا،
  • دۇرنا تئلی وار باشیندا،
  • بۇ گلن ائیواز، بۇ گلن.
  • مئیداندا ایگیدلر مردی،
  • قاباقدا ار اوغلو اردی،
  • داوا گۆنو قێزمیش نردی،
  • بۇ گلن ائیواز، بۇ گلن.
  • میسری قێلینج دستینده‌دی،
  • عرباتین اۆستونده‌دی،
  • شیرین جانین قصدینده‌دی،
  • بۇ گلن ائیواز، بۇ گلن.
  • جمعی دلیلرین خاسی،
  • مئیداندا وار مرد داواسی،
  • کور‌اوغلونون تک بالاسی،
  • بۇ گلن ائیواز، بۇ گلن.
  • نیگار خانیم دئدی:
  • – کور‌اوغلو، دوغرودان دا دۇرنا تئلی ائیوازی یاخشی تۇتور. دۇرنا تئلی
  • دلیلری بئله تۇتاندا گؤر بیزی نئجه تۇتار. گؤندر دلیلری گئتسینلر بیزه
  • ده دۇرنا تئلی گتیرسینلر.
  • کور‌اوغلو هله نیگار خانیما جاواب وئرمه‌میشدی کی، ائیواز دلیلرله
  • گلیب یئتیشدی. نیگارین کور‌اوغلویا دئدیگی سؤزلری ائشیدیب، دئدی:
  • – دۇرنا تئلی ندی کی، اوندان اؤتری آنامین قلبینی سێندیریرسان؟ ایزن وئر
  • گئدیب باغداتدان اونا دۇرنا تئلی گتیریم.
  • کور‌اوغلو دینمه‌میش دمیرچیوغلو یئریندن دئدی:
  • – آی کور‌اوغلو، ائیواز تک گئتمه‌سین، ایزن وئر من ده اونونلا گئدیم.
  • بللی احمد دئدی ایزن وئر، من ده گئدیم.
  • چوخدان ایدی کی، دلیلر صفره چێخمامیشدیلار. بۇ بۇردان دئدی، من
  • ده گئتمک ایسته‌ییرم، او اوردان دئدی، ایزن وئر من ده گئدیم. کور‌اوغلو
  • بیلمه‌دی کی، هانسینا جاواب وئرسین، هانسینی دۇرنا تئلینه گؤندرسین. هله
  • کور‌اوغلو اؤزو ده دۇرنا تئلینه گئتمک ایسته‌ییردی. نیگار خانیم کور‌اوغلونون
  • دلیلری باشسیز قویوب گئتمه‌یینه راضی اولماییب دئدی:
  • – یوخ، اؤزون قال، گؤزون دلیلرین اۆستونده اولسون. قوی دۇرنا تئلینه
  • ائیوازگیل گئتسینلر.
  • کور‌اوغلو ائیوازا ایزن وئردی. یول اۇزاق اولدوغوندان تاپشیردی کی، قێراتی
  • مینسین. ائیواز میسری قێلینج باغلادی، قالخان تاخدی. قێراتی چکیب یهرله‌دی،
  • ترلان کیمی قالخیب آتین اۆستونه ایلشدی. دمیرچیوغلو ایله بللی احمد
  • ده داوا لیباسی گئییندیلر، آتلاندیلار، اۆچو ده بیرلیکده یولا دۆشدولر.
  • کور‌اوغلو دلیلره اۇزاق صفره گئدنده اؤزلری ایله ایچگی گؤتورمه‌یه ایزن
  • وئرمزدی. آمما دمیرچیوغلو اوندان خلوت تۇلوقلاری شرابلا دولدوروب
  • گؤتورموشدو. دلیلر آتلارینی سۆروب یولا دۆشدولر. دئ گۆنه بیر منزیل،
  • تئییی-معنازیل آت سۆردولر، یول یوردولار، دره کئچدیلر، دۆز گئتدیلر،
  • داغ آشدیلار، منزیل کئچدیلر آخیردا گلیب باغداد ائلینه چاتدیلار. آتلاری
  • باغلارا اوتلاماغا اؤتوروب اؤزلری جالاندیلار دۇرنالارین جانینا. دۇرنالاری
  • قێردیلار، تئللرینی بیر یئره اۆست-اۆسته یێغدیلار، اتلرینی ده اوجاق قالاییب
  • کاباب چکدیلر. اولا دۇرنا اتینین کابابی، قارا اۆزومون شرابی، اؤزو ده
  • هاردا-هاردا باغدادین گۆل-گۆلو چاغیران سرین باغلاریندا. چشمه‌لر ائله
  • آخیردی کی، ائله بیل گؤز یاشیدیر.
  • بئله صفالی بیر یئرده اۆچ نفر چنلیبئل دلیسی، دۇرنا کابابی، شراب
  • دا کی، ائله بیل جئیران قانیدی…
  • غرض یئدیلر، ایچدیلر، گؤزلری دۇمانلاندی، یاواش-یاواش مست اولوب
  • اۆچو ده باشلارینی یئره قویدولار، یات کی، یاتاسان.
  • بۇنلار بۇرادا مست-بیهوش یاتماقدا اولسونلار، سنه کیمدن دئییم،
  • باغداد پاشاسی آسلان پاشادان.
  • بۇ طرفدن باغداد پاشاسی آسلان پاشایا خبر وئردیلر کی، اۆچ
  • نفر آتلی گلیب آتلارینی باغا بۇراخیب، اؤزلری ده بۆتون دۇرنالاری قێریب
  • چاتیبلار. آسلان پاشا حؤکم ائله‌دی کی، بۇ ساعت اؤزلرینی ده، آتلارینی دا تۇتوب
  • منیم یانیما گتیرین.
  • قوشونا امر اولوندو، باغین دؤرد طرفینی گزدیلر. قێرات دۆشمنین
  • یاخینلاشدیغینی گؤروب برک کیشنه‌دی. دمیرچیوغلو ایله بللی احمد
  • قێراتین سسینه یۇخودان آییلدیلار. گؤردولر کی، باغدا اوتون، آغاجین سانی
  • وار، قوشونون سانی یوخدو. دمیرچیوغلو ایسته‌دی کی، داوا باشلاسین، بللی
  • احمد راضی اولمادی کی، ائیواز اؤزونده دئییل، بیز داوا باشلاساق بۇردان
  • اۇزاقلاشاریق، ائیواز اله کئچر. دمیرچیوغلو گؤردو قوشون یاخینلاشیر،
  • آمما ائیواز یۇخودان اویانمیر کی، اویانمیر. آخیردا آلدی، گؤرک نه دئدی:
  • قوشون گلیب دؤرت یانیمیزی آلدیلار،
  • بئله نه یاتمیسان، آییل، ائیواز خان!..
  • هر طرفدن مانسیرایا سالدیلار،
  • آخیردا اولاریق زاییل، ائیواز خان!..
  • قبول قێلما مۆخننتین سؤزونو،
  • سنه عرض ائله‌یم سؤزون دۆزونو،
  • دۇر، گؤستر یاغییا دؤنمز اۆزونو،
  • گۆن کیمی عالمه یاییل، ائیواز خان!..
  • اینصافدیرمی بللی احمد تۇتولا،
  • قۇلاج قولو دال گردنده چاتیلا،
  • دمیرچیوغلو قۇل آدینا ساتیلا،
  • کور‌اوغلو دلیسی ساییل، ائیواز خان!..
  • سازین سسینه، دمیرچیوغلونون سسینه ائیواز یۇخودان آییلدی.
  • یۆیوردولر کی، اؤزلرینی آتلارا یئتیرسینلر. باخدیلار کی، آتلار تۇتولوب. حالی
  • بئله گؤرنده هر اۆچو قێزمیش نر کیمی نره چکیب اؤزلرینی وۇردولار
  • دریایی-لشکره، ساغا وۇردولار، سولا وۇردولار، نه قدر قێردیلارسا نه
  • قوشونون دالی کسیلیردی، نه ده کی، بیر یول تاپیب بیر طرفه چێخا بیلمیردیلر.
  • آخیردا قوشون اونلاری بیر-بیرلریندن آیری سالیب، تکله‌دی. آرالیغا سالیب
  • اۆچونو ده تۇتدولار، قوللارینی باغلاییب، آتلاری ایله بیرلیکده آسلان پاشانین
  • یانینا گتیردیلر. آسلان پاشا حؤکم ائله‌دی کی، اؤزلرینی زیندانا سالیب،
  • آتلارینی دا بازارا چکیب ساتسینلار. سونرالار کیمین هایفی وارسا گلسین، آلسین.
  • آسلان پاشانین آداملاری دلیلری زیندانا سالیب آتلارینی دا بازارا
  • آپاردیلار. بۇنلار بۇرادا قالسینلار، سنه کور‌اوغلونون دوستو بعضیرگاندان
  • خبر وئریم.
  • کور‌اوغلونون بیر بعضیرگان دوستو وار ایدی. نئچه ایللر کور‌اوغلو ایله دوستلوق
  • ایشلتمیشدی. ایندی ماللارینی ساتماق اۆچون باغدادا گلمیشدی. بیر ده ائشیتدی
  • کی، جار چکیرلر کی، کور‌اوغلونو تۇتوبلار. تئز بیر تهر اؤزونو زیندانا
  • سالدی، گؤردو یوخ، تۇتولانلار کور‌اوغلونون دلیلریدی. ائیواز بعضیرگانی
  • گؤرجک تانیدی، بیر تهر اونو باشا سالدی کی، بس قێراتی بازارا چکیب ساتاجاقلار،
  • گئت چالیش، ساتین آل. کور‌اوغلویا خبر وئر!
  • بعضیرگان اورادان چێخیب بیرباش بازارا گلدی. گؤردو بۇدو آتلاری ساتیرلار.
  • بعضیرگان قێراتی ساتان دللالا یاناشیب دئدی:
  • – ایه، بۇ شێلخورونا نئچه وئریم؟
  • دللال دئدی:
  • – گؤزلرینی سیل بیر یاخشی-یاخشی باخ. شێلخور ندی؟ بۇنا کور‌اوغلونون
  • قێراتی دئیرلر.
  • بعضیرگان دئدی:
  • – ایه، باشینا آت تپمه‌ییب کی، قێرات ندی؟ بۇ یابی نییه قێرات اولور؟
  • دللال حیرصله‌نیب “یابی ندی، اده، ترلاندی! ترلان گؤر نه چکیر؟!.”
  • – دئییب آتی حرکته گتیردی کی، جاماعت باخسین.
  • گؤزونه دؤنوم قێرات گؤزونون بیرینی یۇمدو، قۇیروغونو قێسدی،
  • اؤزونو وۇردو شێلخورلوغا.
  • بعضیرگان دئدی:
  • – ها گؤردون. یامان چکیر، اده، آی یئلبئیین.
  • قوچ کور‌اوغلونون قێراتینی پاشالار مینه بیلمیردی. قورخودان بیر پهلیوان
  • اونون یانینا گئده بیلمزدی. ایندی قێرات ائله اؤلو اولموشدو کی، گل
  • گؤره‌سن…
  • بازار آداملاری تؤکولوب آتا باخدیلار. گؤردولر بیر گؤزو کور، قێسیق،
  • یئریینده ده آزجا توپاللایان بیر آتدی.
  • هامیسی بعضیرگانین سؤزونو تسدیقله‌دی. غرض، بعضیرگان دللالی آلدادیب
  • قێراتی اۇجوز قییمته آلیب منزیلینه گتیردی. آتی بیر یانا باغلاییب
  • قاباغینا یئم-زاد تؤکدو. شییردینی گؤندریب بازاردان بیر باتمان قێر،
  • بیر توپ دا بئز آلدیردی. ائله کی، قێر دا، بئز ده حاضیر اولدو بعضیرگان قاباقجا
  • او کی، وار بئزی قێرلادی. سونرا بۇ قێرلا بئزی قێراتا مؤحکم-مؤحکم
  • ساریییب اؤزو ده میندی. قێر بعضیرگانی ائله تۇتدو کی، کندیر-قاییش کیمی. ائله
  • کی، بعضیرگان آرخایینلاشدی کی، تای آتدان یێخیلمایاجاق، یۆیه‌نینی بۇراخدی.
  • قێرات گؤتورولدو، نه گؤتورولدو. ائله بیل کی، چنلیبئلده بالا قویوب
  • گلمیشدی. واللاه بیر گئدیردی، بیر گئدیردی کی، ایلدیریم دئییم سنه یالاندی.
  • آمما کیمدن دئییم سنه بعضیرگاندان. یازیق بعضیرگاندا بعضیرگانلیق
  • قالمامیشدی. کؤهنه بعضیرگاندا ائله بیرجه قۇرو نفس قالمیشدی. بایاخ ها
  • اؤزوندن گئتمیشدی. قێرات نه قدر یول گئتدی بعضیرگان بیلمه‌دی. بیر واخت
  • بیر ده آت برکدن کیشنه‌دی. بعضیرگان گؤزلرینی آچیب گؤردو چنلیبئلده‌دی.
  • دلیلر قێراتین سسینی ائشیدیب تؤکولوب گلدیلر. باخدیلار واللاه قێرات
  • بۇدو ایلان وۇرموش کیمی ائله گلیر کی، آز قالیر دێرناقلاری چاتلایا. آمما
  • کی، تکدی. ائیواز دا اۆستونده یوخدو. آت بیر آز دا یاخینلاشاندا دقت
  • وئریب گؤردولر آت صاحبسیزدی. آمما دئیه‌سن اۆستونده نه دیرسه بیر یامان
  • شئی قارالیر. هامی فیکیر دریاسینا جۇمدو کی، گؤره‌سن بۇ نه سیردی.
  • بۇنلار ائله بۇ فیکیرده قێرات گلیب دۆز کور‌اوغلونون قاباغیندا دایاندی،
  • اۆزونو گلدیگی طرفه تۇتوب ائله بیر نره چکیب کیشنه‌دی کی، داغ-داش
  • لرزه‌یه گلدی. سونرا دؤنوب کور‌اوغلویا باخدی، آیاقلارینی یئره دؤیمه‌یه
  • باشلادی. کور‌اوغلو وفالی آتینین بوینونو قۇجاقلاییب اۆزوندن، گؤزوندن
  • اؤپدو. باخیب گؤردولر کی، قێراتین اۆچتونده بیر آدام وار. آمما اؤزوندن
  • گئدیب. بۇنو آچیب آتدان دۆشوردولر. باشینا سۇ-زاد تؤکوب اؤزونه گتیردیلر.
  • باخدیلار کی، بعضیرگاندی. کور‌اوغلو اونو گؤرجک تانیدی، سوروشدو کی:
  • – بعضیرگان، ائیواز هانی، یولداشلاری هارادا قالیب کی، سن قێراتی گؤتوروب
  • گلیبسن؟
  • بعضیرگان دئدی: – کور‌اوغلو! ائیوازی، دمیرچیوغلونو، بللی احمدی
  • آسلان پاشا تۇتوب زیندانا سالیب. بۇ گۆنلرده دارا چکدیره‌جک. دۇرما،
  • تئز اؤزونو اونلارا یئتیر.
  • کور‌اوغلو بعضیرگاندان بۇ سؤزو ائشیدیب اۆزونو دلیلره تۇتدو، آلدی،
  • گؤرک نه دئدی:
  • خبر وئرین دلیلریم اویانسین،
  • تۇتولوبدو بیر ائیوازیم الده‌دی!
  • میسری قێلینج قێزیل قانا بویانسین،
  • تۇتولوبدو بیر ائیوازیم، الده‌دی!
  • یاتمیشدیم آشکارا گؤردوم دۇشومو،
  • ازلیندن من بیلیردیم ایشیمی،
  • چکین، یهرله‌یین چرله‌میشیمی،
  • تۇتولوبدو بیر ائیوازیم، الده‌دی!
  • دۆشمنلریم تاماشایا دۇرارلار،
  • شاد اولوبان کئیف مجلیسی قۇرارلار،
  • کور‌اوغلو گئتمسه یقین قێرارلار
  • تۇتولوبدو بیر سرداریم، الده‌دی!
  • دلیلر تله‌سیک یاراقلاندیلار، آتلارینی یهرله‌دیلر. کور‌اوغلو میسری
  • قێلینجی بئلینه باغلادی. قالخان آسدی، عمود گؤتوردو، اۆستوندن ده بیر ساز
  • کئچیریب قێراتا میندی. دلیلر ده باشیندا باغدادا طرف یولا دۆشدو. هر
  • یئردن کئچیب گلدیلر باغدادین کنارینا یئتیشدیلر. شهره گیرمه‌یه آز
  • قالمیشدی کی، بیر قوجا بیچینچییه راست گلدیلر. گؤردولر قوجا تاخیل بیچیر.
  • آمما گؤزوندن دولو کیمی یاش تؤکور. کور‌اوغلو یاخینلاشیب سوروشدو:
  • – آی قوجا نییه آغلاییرسان؟
  • قوجا دئدی:
  • – نئیله‌ییرسن، سندن کی منیم دردیمه درمان اولمایاجاق، چێخ
  • یولونلا گئت.
  • قوجا سؤزونو نه قدر یاییندیردیسا کور‌اوغلو ال چکمه‌دی. آخیردا
  • قوجا سوروشدو:
  • – ایندی کی، ال چکمیرسن، قاباقجا دئ گؤروم کور‌اوغلوینان دوستسان،
  • دۆشمن؟
  • کور‌اوغلو دئدی: – دوست اولاریق. نه وار کی، اونو نییه خبر آلدین؟
  • قوجا دئدی:
  • – کور‌اوغلونون اۆچ دلیسی گلیب بۇرایا چێخیبدی. بۇ گۆن باغداددا
  • اونلاری دار آغاجیندان آساجاقلار. اۆچ جاوان ایگید اوغلانلاردی. ائله‌دیلر کی،
  • شکیل کیمی، ائله دوغروسو اونلارین حالینا آغلاییرام.
  • کور‌اوغلو قوجانی بئله مرد، ناموسلو گؤروب دلیلره حؤکم ائله‌دی کی،
  • قێلینجلاری چکیب قوجانین تاخیلینی بیچسینلر. دلیلر قێلینجلاری چکیب تاخیلا
  • دولوشاندا قوجانین گؤزلری آلاجالاندی. ایکی الینی دیزینه وۇروب اؤز-اؤزونه
  • دئدی:
  • – وای ائوی یێخیلان جانیم! یقین بۇ کله-کؤتور اوغلو کله-کؤتور
  • پاشانین آداملاریندان ایمیش. بۇ ساعت تاخیلی وئل-وئران ائله‌ییب، منی ده
  • اؤلدوره‌جکلر.
  • آمما دقت ائله‌ییب باخدی کی، بالام بۇنلار تاخیلی بیچیرلر. قوجا
  • قالدی مات-مهتتل کی، گؤره‌سن بۇنلار کیمدیلر. بۇ بئله فیکیرلرده
  • اولسون، دلیلر تاخیلی بیچیب درز-درز باغلاییب بیر طرفه یێغدیلار. ائله کی،
  • حاضیر اولدو کور‌اوغلو اۆزونو قوجا بیچینچییه تۇتوب دئدی:
  • – قوچ کور‌اوغلو ائله منم کی، وارام. ایندی آسلان پاشانین باشینا
  • گؤیدن اود تؤکه‌جه‌یم. خزینه‌سینی داغیدیب پایلایاجاغام. بیر خۇرجون
  • گؤتوروب خزینه‌نین قاپیسیندا اولارسان.
  • قوجا سئویندیگیندن بیلمیردی کی، نه ائله‌سین. آخیردا بیر تهر کی،
  • اؤزونو جمعله‌ییب دئدی:
  • – بالا، شهره بئله گیرمه. آسلان پاشا خبر تۇتار، سیز یئتیشنه
  • قدر دلیلری آزدیرار، قوی باشینداکی دلیلر دؤرت بیر دؤرت بیر اولوب
  • آداملارا قاریشسینلار، شهره ائله گیرسینلر.
  • بیچینچی قوجانین سؤزو کور‌اوغلونون خوشونا گلدی. آنجاق هله شهره
  • چوخ قالیردی. بیر آز دا گئتمیشدیلر بیر ده گؤردولر کی، بۇدو قاباقدان بیر
  • آتلی تله‌سیک آتینی سۆروب چؤله طرف گئدیر. دلی حسن آتا بیر مهمز
  • وۇروب اؤزونو چاتدیردی آتلییا. باخدی کی، بۇ آتلی اینینده چۇخا، آیاغیندا
  • باشماق، قانوووز آرخالیغین اۆستوندن ده بئلینده تیرمه شال اولان
  • ائنلیکورک، قارنی یوغون بیر کیشیدی. آتین ترکینده بیر خۇرجون، خۇرجونون
  • بیر گؤزونده چؤرک، بیر گؤزونده بیر سرنیج قاتیق وار ایدی. اؤزو ده دئیه‌سن
  • کیشی چوخ تله‌سیردی.
  • دلی حسن دئدی:
  • – آ کیشی، بیر دایان گؤروم، بئله هارایا گئدیرسن؟
  • کیشی جاواب وئردی کی:
  • – چؤلده بیچینچیلریمیز وار، اونلارا چؤرک آپاریرام. نه سؤزون وار،
  • تئز اول دئ تله‌سیرم. گرک تئز قاییدام شهره.
  • دلی حسن دئدی:
  • – یاخشی، شهرده نه وار کی بئله؟ خئییر اولا.
  • کیشی دئدی:
  • – آسلان پاشا بۇ گۆن کور‌اوغلونون اۆچ دلیسینی آسدیراجاق. بؤیوک
  • شادیانالیق اولاجاق. ایندی تله‌سیرم کی، تئز او شادیانالیغا چاتا بیلم.
  • دلی حسن کیشیدن ائله بۇ سؤزو ائشیتجک الینی آتیب کیشی‌نین خێرتده‌ییندن
  • تۇتوب دیک آتین اۆستوندن گؤتوردو. ائله ائله‌جه گتیردی کور‌اوغلونون
  • حۆضورونا. کور‌اوغلو باخدی کی، کیشی چوخدان جهنمه واصیل اولوب.
  • سوروشدو کی:
  • – بۇنو نییه بوغدون؟
  • دلی حسن احوالاتی دانیشدی. کور‌اوغلو باخدی کی، دئمک بۇ گۆن ائیوازگیلی
  • دوغرودان دا آساجاقلار. اۆرگی غضبله دولوب آلدی، گؤرک نه دئدی:
  • اۇجا-اۇجا داغ باشیندا
  • یاز بیر یانا، قێش بیر یانا.
  • تیترشیر آغزیم ایچینده،
  • دیل بیر یانا، دیش بیر یانا.
  • نه ائدک، دلیلر، ائدک!
  • دۆشمنین باغرینی دیدک!
  • خان ائیوازا کؤمک ائدک!
  • دؤرد بیر یانا، بئش بیر یانا.
  • هر نه اولدو منه اولدو،
  • قاینادی پایمانام دولدو،
  • گؤردون کی، دۆشمن گۆج گلدی،
  • قوو بیر یانا، قاچ بیر یانا.
  • کور‌اوغلونون یوخ علاجی،
  • مصردن گلیر خراجی،
  • چکنده میسری قێلینجی،
  • لئش بیر یانا، باش بیر یانا.
  • کور‌اوغلو دلیلری دؤرد بیر-بئش بیر ائله‌دی. دئدی:
  • – جاماعتا قاریشین، شهره گیرین. آمما تا کی، من اللریمی بێغیما
  • چکمه‌میش، داوایا باشلامایین.
  • کور‌اوغلو بۇنو دئییب اؤزو تک باشینا چیینینده ده ساز شهره گیردی.
  • بۇ بۇرادا قالسین، سنه کیمدن دئییم، آسلان پاشادان.
  • آسلان پاشا دار آغاجی قۇردورموشدو. دلیلری ده دار آغاجی‌نین یانینا
  • گتیرتمیشدی. جللاد قاباقجا ائیوازی دار آغاجینا گتیردی. قوللارینی چێرمالاییب
  • ایپی حاضیرلاماغا باشلادی. دمیرچیوغلو ایشی بئله گؤرنده گؤزلرینی
  • یاش تۇتدو، آلدی، گؤرک نه دئدی:
  • هانی منیم قوچ کور‌اوغلوم،
  • گله گیره بۇ مئیدانا!
  • چکنده میسری قێلینجی،
  • قبزه‌سی قانا بویانا!
  • قێرات بیر بۇردان آتیلا،
  • مۆخننت، اؤلکن چاپیلا!
  • کور‌اوغلو بۇردا تاپیلا،
  • هره‌نیز قاچا بیر یانا!
  • دمیرچیوغلونو دیندیر،
  • سۇچونو بوینونا میندیر،
  • بیز ایکی دلینی اؤلدور،
  • گل، سن قێیما ائیواز خانا!
  • دمیرچیوغلو سؤزونو تامام ائله‌ینده کور‌اوغلو گؤزلری قێزمیش اؤزونو
  • مئیدانا سالدی. آسلان پاشا دا مئیداندا ایدی. کور‌اوغلونون چیینینده ساز
  • گؤروب دئدی:
  • – ایه، آشیقسانمی؟
  • کور‌اوغلو دئدی: – آشیغام.
  • آسلان پاشا دئدی:
  • – اوندا کور‌اوغلونون دلیلرینی آسدیرماقدان قاباق بیر اوخو، کئفیمیز
  • آچیلسین.
  • کور‌اوغلونون باشیندا گلن دلیلر آداملارین آراسیندا ایدی. داوا
  • باشلاماق اۆچون کور‌اوغلونون ایشاره‌سین گؤزله‌ییردیلر. هامیسی ائله ایدیلر کی،
  • دوداقلارینی گمیریب، بێغلارینی چئینه‌ییردیلر. کور‌اوغلو دلیلره باخیب
  • گؤتوردو، گؤرک نه دئدی:
  • دلیلریم، بۇ گۆن داوا گۆنودو،
  • مۆخننس اؤلکه‌سی تالانماق گرک!
  • قوچ ایگیدلر یاراسیندان بللنر،
  • شربت تک قانینی یالانماق گرک!
  • مرد ایگیدلر نره چکسین داوادا،
  • شاهین کیمی شیکار تۇتسون یۇوادا،
  • میسری قێلینج جؤولان وۇرسون هاوادا،
  • باغیرساق جمعده‌یه دولانماق گرک!
  • کور‌اوغلو ایچنده دۆشمن قانینی،
  • مرد مئیداندا نره‌سیندن تانینی،
  • قێرین وزیرینی، تۇتون خانینی،
  • لئش-لئشین اۆستونه قالانماق گرک!
  • آسلان پاشا دئدی:
  • – آی آشیق، سن ائله اؤلوب اؤلدورمکدن دئییرسن. بۇ ندی؟ نییه
  • قێشقیریرسان؟ بیر آز آلچاقدان اوخوسانا!
  • کور‌اوغلو آسلان پاشانین جاوابیندا دئدی:
  • – قۇلاس آس، اوخویوم.
  • آجیغیندان قان کور‌اوغلونون بئینینه وۇرموشدو، گؤزلری قێپقیرمیزی
  • قێزارمیشدی. دار آیاغیندا دایانان ائیوازا باخیب آلدی گؤرک نه دئدی:
  • جانیم پاشا، گؤزوم پاشا،
  • پاشا قوی، گلسین ائیوازی!
  • بۇدو سانا سؤزوم پاشا،
  • پاشا، قوی گلسین ائیوازی!
  • گؤیدن ایلدیریم تؤکدوررم،
  • یۇردوندا بوستان اکدیررم،
  • تورپاغین داغا چکدیررم،
  • پاشا، قوی گلسین ائیوازی!
  • ایلشیب پاشالار، بَیلر،
  • سینمدن باش وئریب میللر،
  • کور‌اوغلو ایلتیماز ائیلر،
  • پاشا، قوی گلسین ائیوازی!
  • کور‌اوغلو اوخوماغیندا اولسون، پاشا دا قۇلاق آسماغیندا، سنه کیمدن
  • خبر وئریم، گیزیروغلو مصطفی بَیدن. باغداد طرفیندن گیزیروغلو
  • مصطفی بَی آدیندا بیر ایگید وار ایدی. گیزیروغلونون باشیندا دا قێرخ
  • آتلیسی وار ایدی. اؤزو ده کور‌اوغلو ایله دۆشمن ایدی. آتالار دئییبلر کی، ایکی
  • قوچون کلله‌سی بیر قازاندا قایناماز. او ایگید، بۇ ایگید. گیزیروغلو مصطفی
  • بَی چوخدان ایدی کی، باشی‌نین آتلیلارییلا برابر او داغ سنین، بۇ دره
  • منیم کور‌اوغلونو آختاریردی. اونونلا داوا ائله‌مک ایسته‌ییردی. بیردن
  • خبر چێخدی کی، بس آسلان پاشا کور‌اوغلونون اۆچ دلیسینی تۇتوب اؤزلرینی ده
  • بۇ گۆن آسدیراجاق. بۇ ایش گیزیروغلونا خوش گلمه‌دی. بیر های وۇروب
  • دسته‌سینی باشینا یێغیب دئدی:
  • – آسلان پاشا کور‌اوغلونون اۆچ دلیسینی تۇتوب، بۇ گۆن دارا چکدیره‌جک.
  • من کور‌اوغلوینان دۆشمنم. بۇ اؤز یئرینده، آمما آسلان پاشانین بۇ
  • نامردلیگینه یول وئره بیلمنم. گئدک اونلاری قۇرتاراق.
  • گیزیروغلو بیلمیردی کی، کور‌اوغلو اؤزو ده باغدادا گلیب. دسته‌سینی
  • گؤتوروب شهره گلدی، گلیب مئیداندان بیر آز آرالی دایاندیلار. باخدی
  • کی، کور‌اوغلو آشیق پالتاریندا مجلیسده‌دی. دایانیب باخماغا باشلادی. بۇ،
  • بۇرادا قالسین سنه کیمدن دئییم صدرزمدن. آسلان پاشانین
  • صدرزمی کور‌اوغلودان شۆبهه‌لنمیشدی. آغزینی آسلان پاشانین قۇلاغینا
  • یاپیشدیریب دئدی:
  • – پاشام ساغ اولسون، بۇ آدام یا کور‌اوغلودو، یا دا کی… ائله کور‌اوغلودو
  • کی، وار.
  • آسلان پاشا هئچ اونا باخماییب دئدی:
  • – اشی، سن ده… کور‌اوغلو بۇرادا نه قاییریر. قویمازسان اوخوسون.
  • گیزیروغلو مصطفی بَی باخدی کی، گۆن کئچیر، آمما کور‌اوغلو ائله
  • مجلیسده گزیب اوخویور. فیکیرلشدی کی، بلکه کور‌اوغلونون دلیلری هله
  • گلیب چێخماییب، تک داوا ائله‌مکدن قورخور. گۆن یۇبادیر. قوی بۇرادا
  • اولماغیمی اونا بیلدیریم.
  • گیزیروغلو مصطفی بَی شئشپرینی الینه آلدی، نیشان ائدیب آتدی. شئشپر
  • گلیب مجلیسین یانینداکی مسجیدین گۆمبزینه دیَدی. پاشا دیک آیاغا
  • قالخیب چێغیردی کی:
  • – او ندی؟ اونو کیم آتدی؟
  • کور‌اوغلو باخدی کی، صدرزم اکیلمک ایسته‌ییر. تئز سازی دؤشونه باسیب
  • پاشایا دئدی:
  • – پاشا قۇلاق آس!
  • لاف ائیله‌مه، آسلان پاشا،
  • صدرزم قاچدی ساندیم.
  • هاواداکی هۇمای قۇشلار
  • یۇواسیندان اۇچدو ساندیم.
  • مئیداندا ایگیدلیک ساتدی،
  • گلمه‌دی، گۆنو یۇباتدی،
  • گیزیروغلو شئشپر آتدی،
  • شئشپر یئره کئچدی ساندیم.
  • کور‌اوغلویام، بیلمم نه‌دن،
  • قارا باغریم اولدو زدن،
  • ائیوازدیمی دارا گئدن؟
  • یارالاریم دئشدی ساندیم.
  • ائله کی، کور‌اوغلو سؤزونو دئییب قۇرتاردی، بیر دلیلره باخیب دئدی:
  • هویدو، دلیلریم هویدو،
  • یئریگین مئیدان اۆستونه!
  • هاواداکی شاهین کیمی،
  • تؤکولون آل قان اۆستونه!
  • قویون بدؤیلر کیشنه‌سین،
  • میسری قێلینجلار ایشله‌سین،
  • کیمی تناب قێلینجلاسین،
  • کیمینیز دۆشمان اۆستونه!
  • کور‌اوغلو چکر هاشینی،
  • بَیلر ائلر تاماشانی،
  • من اؤزوم آسلان پاشانی،
  • هره‌نیز بیر خان اۆستونه.
  • کور‌اوغلو اوخویا-اوخویا الینی بێغینا چکدی. دلیلر هر طرفدن الی
  • قێلینجلی تؤکولدولر. داوا باشلاندی. آرا قێزیشمیشدی، هر دلی بیری‌نین اۆستونه
  • یئریدی. کور‌اوغلو آسلان پاشانین اۆستونه هۆجوم ائله‌دی. دلیلر ده قوشونون
  • اۆستونه تؤکولدولر. کور‌اوغلو میسری قێلینجی چکیب آسلان پاشانین بوینونو
  • وۇروب یئره سالدی. دلیلر تنابلاری قێلینجلادیلار. ائیوازین، دمیرچیوغلونون،
  • بللی احمدین قوللارینی آچدیلار. دمیرچیوغلو دار آغاجی‌نین بیرینی
  • چێخارتدی، الینه آلیب اؤزونو دۆشمن قوشونونا وۇردو. خان ائیوازلا بللی
  • احمد ده قوشونا جۇمدولار. داوا بیر قێزیشدی، بیر قێزیشدی کی، رۇزیگارین
  • گؤزو بئله داوا گؤرمه‌میشدی.
  • ایگیدلر وۇروشدو، قورخاقلار قاچدی. مردله نامرد سئچیلدی، مرد
  • اوغول بسله‌ین آنالارین باشی اۇجالدی، نامرد بسله‌ین آنالار یئره گیردی.
  • داوانین شیرین یئرینده گیزیروغلو مصطفی بَی اؤز دسته‌سی ایله گلیب چاتدی.
  • ایکی طرفدن آسلان پاشانین قوشونونو آرایا آلدیلار. قوشوندان قێریلان
  • قێریلدی، قاچان قاچدی، داغیلدی.
  • دۆشمن باسیلاندان سونرا گیزیروغلو باشیندا دسته‌سی گئری قاییتدی.
  • بۇ طرفدن کور‌اوغلو اؤزونو پاشانین خزینه‌سینه یئتیردی. بیر تپیک وۇردو،
  • خزینه‌نین قاپیسی تایباتای آچیلدی. کور‌اوغلو بیر ده باخدی کی، بیچینچی قوجا
  • الینده بیر خۇرجون کسدیریب خزینه‌نین قاپیسینی.
  • کور‌اوغلو دئدی:
  • – قوجا، گیر خزینه‌دن خۇرجونونو دولدور آپار.
  • تای قوجانین حالینی سوروشما. اؤزونو خزینه‌نین ایچینه سالیب خۇرجونونو
  • خێرجیم-خێرجیم دولدوروب دۆزلدی یولا.
  • ائله کی، داوا قۇرتاردی، هامیسی بیرلیکده کئفلری ساز، داماقلاری چاغ
  • آتلانیب چارداخلی چنلیبئله یولا دۆشدولر. کور‌اوغلو بیلیردی کی، گیزیروغلو
  • مصطفی بَی ائله بئله چێخیب گئتمه‌یه‌جک. حؤکمان اونون یولونو
  • کسه‌جک، اونونلا وۇروشاجاق، اؤزو ده دلیلرین یانیندا. چۆنکی بیلیردی کی،
  • گیزیروغلو مرد آدامدی. او آنجاق کور‌اوغلونون اؤزو ایله حاق-حساب
  • کسمک ایسته‌ییر. یوخسا اصلینده اونونلا دۆشمنچیلیگی یوخدو. اودو کی،
  • قصداً دلیلریندن گئرییه قالمیشدی. قێراتی بیر چای قێراغی ایله یاواشیاواش
  • سۆروردو. او طرفدن ده گیزیروغلو مصطفی بَی دوغرودان دا
  • کور‌اوغلونون یولونو کسمیشدی. کور‌اوغلو گلیب اونون یانینا چاتماغا آز
  • قالمیشدی. قێرات کیشنه‌ییب گؤتورولدو.
  • گیزیروغلو مصطفی بَی آلاپاچانی اونون دالینا سالدی. قێرات آلاپاچانین
  • سسینی ائشیتجک یئرینده‌جه دایاندی. کور‌اوغلو دؤنوب گیزیروغلونو
  • یانیندا گؤردو. کور‌اوغلو همهوش ائله‌ییب ال آچانا قدر گیزیروغلو اونون
  • باشیندان بیر عمود ائله وۇردو کی، کور‌اوغلو آتدان بیرباش یاخینداکی چایا
  • یێخیلدی. گیزیروغلو سێچراییب یئنه ده اونون باشی‌نین اۆستونو آلدی. کور‌اوغلو
  • چایدان چێخدی. گیزیروغلونا ال وئردی. سونرا آتینی مینیب دینمز-سؤیله‌مز
  • یولونا داوام ائله‌دی. بیر آز گئدیب دلیلره چاتدی. آمما بۇ ایشی یولدا
  • دلیلره آچمادی. آتلاری سۆروب گلدیلر چنلیبئله چاتدیلار. کور‌اوغلو
  • قێراتدان، دلیلر ده اؤز آتلاریندان تؤکولدولر. ایچکی مجلیسی قۇرولدو.
  • دلیلر اوتوروب کئفه باشلادیلار. بۇنلار کئفده اولسونلار، سنه کیمدن
  • دئییم، گیزیروغلوندان. گیزیروغلو ائله کی، اؤز آداملاری‌نین یانینا قاییتدی،
  • هامیسی دئدیلر کی، کور‌اوغلودان قورخوب قاچیبسان. گیزیروغلو نه قدر
  • دئدی کی، قورخمامیشام، وۇروشدوق. آنجاق نه او منی باسا بیلدی، نه ده
  • من اونو. دسته اینانمادی. آخیردا گیزیروغلو هرسله‌نیب دئدی:
  • – اینانماییرسینیز گئدک چنلیبئلده بیر ده وۇروشاق. اؤزونوز گؤرون.
  • هامیسی بیرلیکده چنلیبئله گلدیلر. آمما گیزیروغلونون فیکری بۇ
  • ایدی کی، کور‌اوغلو ایله وۇروشاندا ائله ائله‌سین هئچ بیریسی باسیلیب خار اولماسین.
  • بلی، ائله کی گلیب چنلیبئله چاتدیلار، باخدیلار کی، مجلیس قۇرولوب. دلیلر،
  • خانیملار، کور‌اوغلو اؤزو هامی کئفه مشغولدو، گیزیروغلو اؤز آداملارینا
  • دئدی:
  • – بۇ کئفی پوزماق نامردلیکدی. گلین گؤزله‌یک، قۇرتارسینلار، سونرا.
  • هامی راضیلاشدی. بیر طرفده دۇروب گؤزله‌مه‌یه باشلادیلار.
  • نیگار خانیم ائیوازی ساغ یانیندا ایلشدیرمیشدی. بیلمیردی کی، اوغلونو
  • اؤلومدن قۇرتاردیغینا گؤره کور‌اوغلویا نئجه راضیلیق ائله‌سین. باخیب-باخیب
  • دئدی:
  • – آی کور‌اوغلو، سن کی، بئله ایگیدلیکلر گؤستریرسن، گؤرن بۇ دۆنیادا
  • سنین کیمی ایگید تاپیلارمی؟
  • کور‌اوغلو بیر فیکیرلشدی، آلدی، گؤرک نه دئدی:
  • آنالار اوغول دوغوبدو،
  • گیزیروغلو مصطفی بَی.
  • بۇ دۆنیایا تک گلیبدی،
  • گیزیروغلو مصطفی بَی.
  • نیزه‌سی‌نین اۇجو قانلی،
  • دلیلری دمیر دونلو،
  • بیر ایگیددی آدلی-سانلی
  • گیزیروغلو مصطفی بَی.
  • بیر آتی وار آلاپاچا،
  • آمان وئرمیر قێرات قاچا،
  • نیزه‌سی‌نین اۇجو هاچا،
  • گیزیروغلو مصطفی بَی.
  • بیر آتادان کاش اولایدیق،
  • بیر-بیریندن خوش اولایدیق،
  • دوغماجا قارداش اولایدیق،
  • گیزیروغلو مصطفی بَی.
  • های گئینده هایا باسار،
  • هۇی دئینده هۇیا باسار،
  • کور‌اوغلونو چایا باسار،
  • گیزیروغلو مصطفی بَی.
  • گیزیروغلو مصطفی بَی کور‌اوغلودان بۇ سؤزو ائشیدیب باشی‌نین آداملاری
  • ایله اونون یانینا گلدی.
  • دئدی:
  • – کور‌اوغلو، سن دوغرودان دا کور‌اوغلوسان. مرد ایگیدسن، بۇ گۆندن
  • سونرا آرادا اولان دۆشمنچیلیگی آتدیم، سنینله قارداش اولدوم. باشیمداکی
  • دستمله سنین دلیلرینه قاریشدیم. ال وئر، دۆشمنینله دۆشمن، دوستونلا
  • دوستام.
  • کور‌اوغلو ایله گیزیروغلو بیر-بیرلرینه ال وئردیلر. او گۆندن دوست
  • اولدولار.

 قایناق‌لار

ارسال یک پاسخ

لطفا دیدگاه خود را وارد کنید!
لطفا نام خود را در اینجا وارد کنید